滑板車
阿仔四歲生日就開始玩滑板車，佢好快就上手平衡到，不過轉彎都學左一陣先識，亦試過帶哂安全設備仍跌親。
阿女差不多同期開始學，但直至五歲佢都未係好平衡到，經常側埋一邊行唔到直線。
學游水
阿哥早過阿女學游水，佢地都唔怕水，阿仔就明多一些教練指示，所以一開始就小組學習。大約學一年之後，阿仔大約無浮具可以游到25米自由式，其他泳式就要浮具協助
曾經諗過駛唔駛搵專教SEN 游水的教練，後來都係試下阿女跟返阿哥個間泳會，不過就上左一排單對對，之後才俾佢小組學游水。
讀書
阿仔讀K2 學校要寫字，上學期大約要求係大階英文，下學期細階英文，佢上學期好快寫到自已個中文名。K2 亦要學數數同寫順序/倒序數字，對阿仔來說又唔係太難，穩定地學就識。去到接近五歲就清楚日期／時間概念，開始學睇鐘。今年亦要開始寫週記，可以畫畫或寫字。
阿女讀S 位第二年，要要認中文字同穿襪子。初時佢都係未得，後來就學得快左。寫字方面，阿女初時學寫「十」字，同L, E 同F，但成日錯交匯點。畫隧道終於少左出界。阿女去到四歲半開始寫到數字，呢個亦係佢報主流學校讀K2 最尾收左佢的其中一個原因。
由於S位學校講到明之後個兩年都唔會主流K3的課程俾阿女，叫我地想讀主流小學就要考慮下午出去讀主流學校半日班，所以阿女讀完第二年S位就報名新學年讀主流K2 半日班，原來學校想收佢讀K1（即降兩年)，最尾我地同學校爭取讀返K2 就算。去到第三年S 位，初時學校話買K1 書，後來爭取之後買K2書。
說話能力
阿仔做言語治療評估終於都合格，唔駛再跟進。 佢聽故事答問題答到一 d, 又識作埋d 唔記得左的部份。對其他問題，如果唔識又懂得同姑娘講唔識。不過有d 野平時無教佢，例如"如果。。。就。。。" 呢類阿仔就差d。不過整體上感覺到佢講野越來越似大人。
阿女說話能力繼續有改善，但仍然係未講得清楚感受。
大肌訓練
阿仔四歲就可以跳到一至兩級樓梯。
阿女用積木疊到八九粒同識排直線或隨便放在一起。開始帶阿女上額外的PT 訓練堂，佢上左幾個月終於學識離地跳起來，除左向下跳亦慢慢學到向上跳。佢去到差不多五歲亦終於可以穩定左右打橫行同行獨木橋。主流K2 的大肌要求包括接波拋波對阿女來說很難學。
圖工能力
阿仔可以畫一些簡單圖形，亦懂得用積木砌不同的形狀如正方形長方形等。剪野亦大致可以跟住D 圖形剪。
阿女剪紙由將紙剪頭髮狀漸漸變剪條狀，老師教左好多方法，真係唔容易。
戒夜片
阿仔未到五歲就成功戒夜片，阿女就稍遲。不過佢地都有點唔同，阿仔會夜晚自已急去廁所，阿女就唔會，所以要提阿女訓覺前去廁所。另外就係阿女起身往往有很多尿，阿仔太多尿就會夜晚起身去。不過兩者間中都會太好訓或者唔記得去廁所而瀨濕床。
