過程係先去醫管局的普通科門診睇症，醫生會叫你剪指甲留樣本化驗。驗到有真菌就會覆診，俾轉介信你去衛生署皮膚科診所排新症，大約需時一年至兩年，視乎個別診所而定。如果有香港腳問題，亦會轉介足科診所先，不過足部治療師只會開外用香港腳藥水，開唔到內服藥，要等皮膚科診所排到睇醫生先有得真正治療。
皮膚科醫生第一次睇症主要係問下病史同有無其他長期病。如果無乜特別就會安排抽血，醫生話主要驗肝功能，亦會驗埋其他傳染病。一個月之後覆診會事就開始食藥(依家政府係開副廠Terbinafine藥)，療程係十二星期，中間會有一次覆診，同埋食完亦會睇一次，呢兩次覆診前兩星期亦要抽血監察肝功能情況。
醫生話大約六成人食完會好返。初時我食六星期去覆診都睇唔到效果，但去到第八星期左右，開始明顯見到新生的腳指部份已經好左，去到大約十二星期覆診時，明顯所有灰甲腳指都好轉左，有D已經同普通腳指無乜分別。醫生之後約數月後再返來覆診。
如果等得的話，睇政府醫生係較平的選擇。
[補充：完成療程後三個月再返去覆診，只餘下其中一隻腳指角落頭還有少少未好返哂，其他都好返哂，不過D指甲明顯比正常厚左好多］
