孖寶的十至十二個月

初稿: 2020年10月31日8:45PM

這段時間的寶寶看似變化慢下來，其實時時刻刻都在成長。

身體動作

大肌肉動作 - 坐/爬/企/扶行

阿仔呢幾個月都係扶住行，但能力逐步提升，包括懂得用手力爬上梳化而不用踩級（然後又爬過梳化側邊手柄位去窗台，再教埋佢梳化自已點爬落去），大人單手扶住佢穿鞋行一段路，行路跌下來時有保護動作，有時又想爬出圍欄。

最妙係打開圍欄俾阿仔出去圍欄以外地方，佢竟然懂得主動自已關圍欄門，不讓阿妹爬出來。

阿女扶坐時間漸漸增長，十個月左右開始識慢慢向前爬，初時用腳拖，後來四肢都發力，但未見pat pat 明顯向上。十一個月開始會爬時向上拎野（如伸手到梳化座位取物件），而且爬得快很多。到一歲左右終於懂得扶住企，時間漸漸增長。不過坐同企都係要其他人幫手開始才得。

小肌肉動作 - 抓握的興趣及技巧

阿女上左職業治療後，買多左不同類型的玩具俾佢玩。例如叫佢從柱座取出膠圈（不過不懂放回)，之後她很喜歡左右手交換物品。

又多了叫她將食物放入口中食。初時手只懂掃入食物到掌心，然後左右手搖，不懂放入口內食。後來開始懂將掌心放入口中，再之後就開始嘗試用手指拎食物。

阿仔學會從柱座取出膠圈後，好快就懂放回去，即使個圈細到剛剛好，佢亦做得到。

阿仔用手指將食物放入口亦難不到他。

與人互動

阿仔阿女都漸漸多左叫「打打」，「BABA」及「MAMA」，但似乎並非對事的反應。

夜晚睡覺中間曾有數星期一晚醒幾次哭，初時老人家幫手抱佢，有時成功有時不成功（成功就放回繼續訓，不成功就可能抱住才訓)。隨後，漸漸次數減少，即使清晨扎醒都多數懂得訓返，而非次次一醒就喊。早上起身亦開始遲一些以及不會即時喊，讓大人可以訓多一些。

飲食及休息時間

睡覺之間的時間漸漸由3小時增長至4-5小時。飲水由用奶樽，用湯匙變成用飲管杯。

一歲時的生活時間表如下(睡覺時間誤差最大,有時可以正負一小時)

6:45am 起身，清潔，飲奶

9:30am 訓覺一小時

10:30am 早晨生果

11:00am 粥

1:00pm 訓覺一小時

2:00pm 沖涼

3:00pm 飲奶

5:30pm 訓覺一小時

6:30pm 食糊仔

9:30pm 睡前奶

10:00pm 睡覺

出牙仔/流口水

一歲時,阿仔出左下面兩隻門牙,阿女就出埋上面兩隻(即總共四隻).流口水情況持續,仍然是成日想咬野。

濕疹

阿女的濕疹時好時壞,靠每週一次浸漂白水加間中用類固醇控制,一般轉天氣時最嚴重。

孖寶的第七至第九個月

初稿: 2020年9月10日

修訂: 2020年11月1日

隨著寶寶懂得周圍轉同移動，視野變得更廣闊，需要更多的關注才滿足到他們。

身體動作

大肌肉動作 - 翻身/坐/爬/企/扶行

其實大肌肉的動作寶寶之間的差距可以好大，除了翻身一般是最快學識的外，其他幾樣的學習之序因人而異。不過一般都建議先識爬再學行。

阿仔大約六個月前識隨意翻身後，好快就雙腳拱起個肚爬行，初時青蛙式向後爬，然後就向前爬。接著好快就用膝頭頂住地下，再加埋手抓住圍欄扶企，然後就扶住行。此時佢未識得坐，成日扶住行時鬆手就跌下來。清晨睡覺時成日爬起身但唔識得坐下，結果企係度大哭。放低佢坐無野扶又會差不多即刻跌下來（阿仔要過左九個月先識企起身點樣坐低同爬起身坐）

阿女大約遲一個月，即大約七個月先識翻身，但之後幾個月都無見到學爬同學坐（阿女要大約十個月才識得由大人放低佢自已坐，但仍未識自已爬）結果醫院覆診初生嬰兒科時，醫生轉介了物理治療（大肌肉)同職業治療（小肌肉)俾阿女。

隨著佢地懂得爬及企，床架亦逐步調低，確保安全。

小肌肉動作 - 抓握的興趣及技巧

阿女被轉介職業治療後，才知道原來小朋友要識好多動作。阿仔雖然好多小肌肉動作都無特別教佢，但佢又做得好過阿女（阿仔自發見野就用不同方法玩）。阿女經過職業治療師提示後，進步亦很明顯（例如識得拎兩樣玩具毃打)

與人互動

笑 - 與人交流的笑

寶寶心情好的時候，見到其他人開心的笑容就自然會笑，笑得越來越多同大聲。

哭 - 離開的哭 / 起身哭 / 扭眼訓哭 / 想搶野食及玩

哭鬧在這個階段比之前多好多，開始見到照顧的人離開會哭，起身又會哭，扭眼訓又會哭，見其他人食野自已無得食又哭，見其他人有野玩但搶不到又哭。

在這個階段需要更多貼身的照顧，否則睇見佢地的哭泣都難以做其他野。

飲食 

出牙與流口水

隨著孖寶出牙，首先牙肉變硬，然後漸漸見到有一點白色，再慢慢見到成隻牙走出來，可說是其中一個成長重要標記。

在出牙之前，隨著牙肉變硬，寶寶已經可以食好多不同的食物，當佢地見到大人食野時，大人分一些飯或麵包俾佢地食都無乜問題。隨著佢地識得坐低，食野不用次次在餐椅，有時席地而坐食野，亦是訓練佢地坐好的好方法。去到九個月左右，己經可以食三餐奶加兩餐固體，其中食粥或食糊已可以食到成碗咁多。粥的濃度已相當接近大人食的濃度，只差在配搭的肉／菜要相當碎，否則佢地唔識食

特別篇 - 阿女尿道炎入院及後續檢查

第一次發佈： 2020年8月31日

第二次更新: 2020年11月5日

第一次入院

阿女八個半月大時，突然以來的發燒
食兩次退燒藥完全無作用，體溫37 度升到39度
即刻決定去急症室
到醫院分流站當urgent case, 量體重，測血氧量同心跳
急症室睇完轉介上兒科，再量體重同身高
兒科醫生檢查後，插條幼喉入鼻抽樣本化驗(新冠肺炎及其他上呼吸道感染)，再加留尿尿袋

由於新型肺炎流行，入院發炎要入半隔離病房，照顧的家人（最多兩個）要等有結果才可以換人(第二次入院時修改至不准換人)，而兒科八歲以下都可以家人24 小時輪流照顧，結果等了近十二小時才有結果。半隔離病房又無遮擋，長開燈，每四小時量體溫，然後食退燒藥，好難訓

原來女孩加尿袋好難收集到尿液，大部分都流落尿片
幾經測試，終於試左三次尿袋，做到初步結果係偵測到白血球同紅血球，即係有感染
醫生建議插道管入去拎尿液做種菌測試，期間開抗生素，因為似尿道炎。插道管拎尿液順便整埋豆打藥，要搞超過一個鐘，阿女的哭聲響遍病房。

阿女住左兩晚，由口服抗生素轉打豆落抗生素（靜脈注射）
打豆後初時仍發燒就成日訓覺，去到唔發燒就係咁喊，想整掉隻豆，結果喊到失聲

最後住左四晚出院，繼續食抗生素多七餐，出院時醫院安排左超聲波覆診，而顯影測試我地就拒絕左，因為入侵性傷害較大。醫院亦俾左張紙可以再發燒就直入兒科病房

第二次入院

然而，之後未夠一星期又再入院，因為突然發燒到38度。去到病房姑娘都抱有懷疑的目光。

今次又係要做返肺炎測試同留尿，不過今次肺炎測試較順利，兩個多小時有結果，可以轉去普通發燒病房

當晚好快就發現尿中有白血球，顯微鏡下有好多細菌，所以又係要打豆同抽尿，今次又係搞左兩個鐘，打豆今次改係腳（因為上次係手阻礙阿女食手指)，開始用靜脈注射抗生素（今次的抗生素較為勁一些)，最終都係要等種菌結果先確實後續方案

即晚駐院醫生拎左部移動式超聲波機照阿女，佢無乜出聲，但第二朝高級醫生來話懷疑阿女有不正常，要urgent 排快隊再照正式超聲波（個幾鐘後有職員推我抱住阿女坐輪椅落去Ｘ光部照了）

因為疫情，醫師收緊到得一個家人可以照顧bb, 即係最多只可以返屋企沖下涼食野又要返醫院

超聲波正式結果係阿女左腎多左條輸尿管，幸好是Y 型，即兩條變一條去膀胱。腎臟接輸尿管附近有積尿，所以易發炎。口服抗生素好難去到果d 位，唯有有排打靜脈入抗生素，打左兩針已經退哂燒

在醫院阿女好躁同成日喊，退燒後又想在床上轉轉轉撞到金屬床架，所以濕疹係咁出，即使醫生開左低強度類固醇同保濕都無乜效果

最後住左五晚，阿女隻腳個豆俾佢整鬆哂滲水後，醫生終於俾佢放假出院轉打肌肉針，每日早晚去醫生打一針，再打多五日，總共打十日。

渡假出院期間，阿女濕疹開始退卻，心情好好多

出院後要持續食預防性抗生素，每晚一次，直至下次做顯影檢查同覆診。抗生素要放雪櫃，大約每個月拎一次。

排尿膀胱尿道造影檢查

由於第二次住院期間照超聲波己發現有結構問題，因此決定接受侵入性的檢查，當中包括打顯影劑照X光的造影檢查。

阿女去的醫院會早一天安排入院做檢查，然後回家渡假。翌日早上返醫院不久，食左一次口服抗生素後，就去我抱住阿女坐輪椅去X光部做多一次超聲波檢查。做完檢查後，阿女中午有一餐粥食。午餐後，主診醫生返來話開左會議，由於情況較為特別，預告要轉介兒童醫院跟進（包括造磁力共振睇結構)。接著又係安排插尿喉（喊到訓著)，然後我抱住阿女坐輪椅去X光部做顯影檢查。我入到去先穿鉛衣，阿女就用紗布挷住兩隻腳，除衫大字型在X光機床上，然後我用雙手拉住阿女。過程一點都不好受，因為工作人員一路打顯影劑入去，一路快速地照多張X光，阿女就不斷喊同用力轉身。由於要影到受影響的那邊腎情況，由於用力讓阿女側身照X光，喊得就更勁。好彩都唔係好耐就做完，可以返病房，主診醫生拔走尿喉，我又餵一餐奶，辦好文件手續，拎埋藥就走得。

孖寶的第四至第六個月

初稿： 2020年5月24日
修訂版：2020年6月9日

四至六個月的寶寶由只食同訓和喜愛抱抱，逐漸變成需要玩和探索的寶寶。

與人互動及自身動作

四個月左右開始識開心就笑，同人有互動，有一排更會明顯鍾意亂咁尖叫，隨後就開始將尖叫伴隨哭聲出來

訓覺時間越來越長，又開始鍾意食手指，繼而鍾意玩自已隻腳

寶寶又開始用手刮頭，要非常勤力幫佢剪指甲，否則成個頭都係血跡

隨著佢地開始側身，慢慢就學識轉身。初時識轉身只懂轉180度，唔識得轉360度，又好容易卡住係床欄。慢慢學識360度轉後，寶寶的活動範圍就會大幅增大。此時，地墊同圍欄就開始需要了。地墊強烈建議買一塊過，千萬不要買拼圖式，因為清潔將是大問題。

醫生／姑娘會教同寶寶玩TUMMY TIME，即係趴係度等寶寶學抬頭。我地的經驗係因人而異，阿仔就好似鍾意玩，未識轉身前幾星期已經好鍾意玩同識抬頭。阿女就直到轉身前幾天才開始肯玩TUMMY TIME，但一識得轉身就抬頭很高。

有些寶寶更喜歡抱住肩膀，雙腳垂下學企。初時企得唔太有力，但慢慢就會企得穩。

飲食

寶寶由純食奶逐步變成食奶為主，其他食物兼食。

食奶方面，奶咀又要轉快一些流速的奶咀，否則食得唔耐煩就喊（標準係大約十至十五分鐘食完一餐，阿女初時食得好慢約食一小時，但到四到六個月就追上正常速度）如果係闊口奶樽，不妨教寶寶自已揸樽，對訓練手部能力有幫助。掃風開始變得有時得，有時唔得，不過都無乜所謂，因為有氣在身內佢就自已會嘈尋求協助，或者自已吐出來。

厭奶期間中會出現，連續幾餐食唔哂就減奶，直至佢想食返多一些才慢慢加返。

加固體食物一般都係米糊開始，但我就買左燕麥糊開始，隨後試過米糊同粟米糊。燕米糊香味最濃，米糊就無乜味，粟子糊就最難開（一係太稀，一係太結）。初時就係抱住寶寶餵米糊，要等佢地適應下由好快趣食奶變成慢慢一啖一啖食糊。後來等佢地坐得好一些，就可以安排佢地坐餐椅，既訓練佢自主坐下，又可以同大人坐埋一齊。

孖寶的首三個月

初稿：2020年3月15日
修訂稿：2020年5月1日

生產之前
由於係孖b 的關係，醫院允許選擇剖腹開刀生產，又或者順產。考慮到孖b 的安全，最後決定預約開刀生產。(其實產檢已知細B明顯唔夠重,最終出世重量和政府產檢估計相當吻合)

入院前的午夜開始禁食，早上天未光就出發去醫院登記處登記入院，然後去產前病房，辦完登記手續，老公陪入產前病房放低隨身行李，然後老公出去等，成堆大肚婆就去換衫，做一連串檢查，之後就排隊等做手術，每個手術約要做一個鐘。（產前病房一齊排隊入院還有見紅穿水等順產的大肚婆，所以約左都要等）

預約開刀手術一般同日有數單，多數又係孖b 或者係之前一胎係剖腹才可以選擇預約開刀。

剖腹時間

雖然預約開刀老公可以陪產，其實睇的時間都係好有限。入到手術室，搞左一輪半身麻醉的功夫，試過哂無問題開緊刀才會叫老公入來睇。丈夫隔著布幕其實都看不到手術情況。此時主要係麻醉科醫生有時間同人傾下，老公見佢負責做log taker，紀錄手術過程同控制麻醉藥份量。

不過，老公入來數分鐘，佢就見到bb 出世俾醫護人員抬去枱上進行清理，打針，然後磅重。後來兒科醫生來報告bb 們一切正常，但其中一個體重過輕，要訓暖氣箱。那個不夠重的小bb(約2KG) 可以放在媽媽頸下數分鐘skin to skin,然後才送去新生兒特別護理部。此時，老公亦離開手術室。聽老公講，手術室內有十幾位醫護人員，有人負責麻醉，有人負責開刀，有人負責照顧bb(而且是兩組人員）。 手術室內播著令人心情舒暢的音樂。

夠重的大bb 就在手術室外的保暖箱訓一陣，待媽媽推到手術後觀察房，在放上媽媽心口skin to skin, 同嘗試吮母乳。

家人在電梯大堂等候，很快就見不夠磅的細bb 俾人推出來送去特別護理。生完的媽媽大約一個鐘後才懷著大bb 俾人連車推落產後病房。

產後病房

去到產後病房，醫院姑娘會逼你嘗試餵母乳同照顧bb，又要紀錄大人同BB大小二便情況，再加bb 吮奶紀錄。 其實傷口痛楚在麻醉藥過後陸續出現，在加上唔係即刻可以食野，又作嘔，開刀生仔真係辛苦。

即使開刀生產，醫院一樣無乜特別就三日兩夜就要出院。大bb 除了首數小時有接駁機監察心跳同血氧量外，之後都唔駛駁機。

晚上bb 喊到七彩，基本上都好難訓到，醫院姑娘才安排抱走bb 去訓箱幾個鐘，聽聞是體溫過低。

第二朝bb 有得沖涼，又有堂上教bb 照顧，不過太累無去上。

一直去到出院，才首次姑娘教餵奶，bb 飲完人生中第一啖15 ml配方奶就好滿足的訓覺，等你可以舒服回家。醫院預左你餵母乳，因此開的奶粉份量非常少，如果以奶粉為主就會餓親bb。

出院前會俾針卡(卡介曲同乙型肝炎預防針)同安排俾錢，最後就剪手環，醫院還提供了bb 的帽留念。

在新生兒特別護理部住的細bb，住了近一星期才出院，期間頭幾日都係訓保溫箱，溫度達32度，所以唔駛點著衫都得。頭幾日bb 都有駁機監察心跳同血氧。醫院要求家長帶尿片同濕紙巾俾姑娘用。特別護理部只限爸媽入去探病，阿媽如果餵奶可以隨時去，否則就要跟探病時間。姑娘每三小時餵奶一次。由於體重不理想，醫生後來開左低體重水奶俾bb 飲(水奶係一枝60ml，每次用即棄的奶咀，有刻度睇到要飲到幾多餵幾多，餘下就扔），等佢恢復返出世重量就出院。去到臨出院前一兩日，bb 只是訓普通床，穿好衣服，出院前已飲到40ml 一餐。出院前，姑娘細心教導餵奶技巧，因為細BB食奶真係超慢(姑娘都要餵成一個鐘)

出院後首一兩星期

首一兩星期，飲奶量增加，訓覺為主
大bb 好少開大隻眼(好多眼屎)，細bb 就成日開大隻眼周圍望，兩個在床上都會係咁踢，由床尾訓訓下變成訓床頭
母乳谷奶，一訓醒就滲出，不過抱住餵大BB會食成一個鐘以上，細BB十分鐘唔夠就唔肯食
bb屎由極黏的黑色(胎糞)漸轉黃色
尿片太大張包唔哂，成日漏，試用p 牌零碼尿片（適用於3kg 以下bb)比h 牌零碼（適用於3.5kg 以下bb)更加細小，更貼近bb size. 不過p 牌零碼好少地方有得買。

臍帶其實幾日就慢慢脫落，脫落後再過幾日乾哂就唔駛特別護理。

三四星期
三四星期，食量增加，細bb 零碼尿片裝唔哂屎尿，但大size仍有好多空位(都係會漏), 大bb 由h 牌零碼轉h 牌nb, 細b 由p 牌零碼轉h 牌零碼，大便持續一日數次，間中有一日無

開始腸絞痛，肚風問題嚴重，放疪，濕疹在臉上出現（大bb 出現先，隨後細bb 都有不過較輕微）。睇左醫生，有醫生開肚風藥但效果唔明顯，另有醫生建議轉低致敏奶粉，價錢較高又難買，但腸絞痛問題有所舒緩

喊的時間鍾意用手刮面，指甲很容易刮到面損哂，記得用手套或連套的衫。

第一個月返健康院覆診打針，由於乙型肝炎針已經係第二枝，所以都無乜特別反應。

五六星期

五六星期，開始兩個一齊喊，互相影響，之前兩個好像互不認識，你有你喊，我有我訓
開始多些對外界聲音有反應，眼珠開始望向聲音源同燈光，特別係大bb 多左好多時間開眼，眼屎逐漸減少。

七八星期

七至八星期明顯感到重左唔少，兩個大約是出世重量的1.7 至1.9 倍，成日抱住會有點累，開始發出一些聲音，例如大便時發出聲音。

大約兩個月就要去健康院覆診兼打針，今次打的有多種未打過的針，兩隻腳都要打，所以打得時候寶寶已經勁大聲叫，打完一兩天有一定的免疫反應，體溫比正常稍高（但未到37度），同稍稍比平時無咁活躍。健康院打完針亦安排去隔離普通科門診藥房拎定退燒藥水。不過最後無安排佢地食。

九至十星期

九至十星期開始日夜較明顯，日頭較活躍，夜晚午夜前後食奶間隔長左，間中唔駛夜奶。坐得較為直同開始嘗試轉身，唔成功就喊。阿哥先阿女後，慢慢開始聚焦同佢講野的人。

兩個BB的頸部明顯較出世時硬淨好多，但仍然未能持續挺直。頭蓋大部份都硬左，但仍有小部份好軟要小心。沖涼時有時會抓住毛巾或大人的衣服。

十一至十二星期

十一至十二星期開始漸漸俾人逗完識笑，不過唔係太耐。阿哥睇大人食野會流口水，唔知係咪都想試下。阿女食奶量持續增加，時間無乜加長。

尿片由NB轉S，再轉M。其實BB實際體重同尿片建議體重與岩唔岩未必真係有關係。只要經常爆屎/尿(裝唔哂)，又或者見紅印就要換大一個碼。因此強烈建議唔好買定太多尿片，否則好容易哂左。

濕疹問題，試過不同的潤膚膏，情況時好時壞，天氣不太乾/濕就會好一些，BB哭的時間短一些亦會好一點。

BB越來越鍾意食手指，即使用了手套亦會隔著手套吐口水。