安排居所 － 租屋／買屋

搞結婚除左要安排有關結婚的各項「儀式」之外，另一重要的事情就是找尋居所。

有時錢解決到的問題，個問題就會轉為搵錢同究竟有其他錢可以用

買屋既可能是一生人中最大的投資，但又是最無乜得選擇的東西

方方面面都合適的單位往往是可遇不可求，有錢都買唔到

所以除左買屋，租樓亦是另一選擇

不過兩者有不同的考量，買樓要睇下自已俾唔俾第一筆大開支（包括首期同各項雜費），之後每個月又要月供，月供數額除著貸款利息而上升（究竟幾時加息幾時減息有時真係好難估計到，但供樓供十幾廿年，大部份國家的經驗都係中間利息會有上有落），因此除左依家供得起，更重要係遇留一定buffer，唔好一次過用哂手上的錢（不過政府辣招的其中一樣，按揭壓力測試已經逼大家月供留彈藥，但就鼓勵d人借少d，其實用哂自已d錢去俾首期，理財上未必是好方法！）另外，因為現在的短期買賣要俾高印花稅，因此買左樓之後三年內都預左無得換樓。如果中間想放租，又要同銀行申請，兼且借款額不可超過樓宇市價的一半(五成以上按揭的樓宇必須自住)。另一樣要留意係越新的樓宇一般管理費會越貴，舊式大型屋宇管理費建築面積計可能只是$1.2-1.5/尺，但有會所的大型屋苑往往可以達$2/尺以上，單棟樓可能會更貴。

不同於買左樓之後的開支主要取決於利息支出，租樓就要面對通貨膨脹下年年加租的問題（當然亦有可能會遇上通縮引致租金下降，但要留意是通縮時期往往經濟會好差，人工亦會下降）。早幾年見到係新區有大型屋苑入伙，往往頭一輪都非常平租就得，但近一兩年發覺即使新樓入伙，租金往往都保持著高的水平，而且好快就俾人租哂。有人話係因為有些新屋苑推遲了入伙期引致的短期效應，但我就覺得這亦可能顯示供不應求，這或許是因為投資者減少，放租的數量有所下降，租金上升速度有所加快，亦可能是實際住宅需求增加。一般來說，暑假會係租務市場旺季，租金升幅會更明顯，供應亦會有所下降，因為好多家庭客同外地學生都會搶租單位，特別是內地學生不少願意付出高價及預付租金。如果想租樓，最好找其他的季節去搵租盤。

不論租樓定買樓，都要找地產經紀幫手，其實大型或小型地產代理行都係有好經紀亦有壞經紀，有些真係好坦白，提醒清楚買樓注意事項，有些就為求目的，什麼都不講清楚(連買樓政府訂下的限制都不提買家)。防人之心不可無，盡量講少ｄ野，小心為上。

婚宴之後用車與拎漏物資同跌下戒指

係酒店搞完婚宴執野回家，中間酒樓會安排結帳，又要同化妝／攝影師等工作人員計數，明明累都爆都要打成十二分精神。之後執野同戥穿石門拎野走，十一點幾近十二點在街上真係好難call車，就算截的士亦唔夠將D物資運回屋企。好彩依家有手機app book van仔，等一陣就有車用，雖然比日頭貴左d，不過真係好方便，值得一讚。落到酒樓下面等車時，收到酒樓電話話原來拎漏左物資，包括一些重要的紀念品，真係多謝酒樓的call!

回到家太太幫手將物資卸下，豈料卸下物資後才發現求婚戒指不知所蹤，找了很耐，由屋企樓下都屋內都找左一輪，最後推開物資，才發現有一閃光，原來求婚戒指在相架的下方，虛驚一場！

所以重要的日子，最好先將重要的東西好好收納，核對清楚才啟程回家，每一步都要小心呢！

花球與手花

一般人當然想用鮮花的花球或手花，但要注意如果用鮮花，將會受制於不同時節有不同的貨源供應，亦唔可以預先太多日拎返去檢查清楚，亦要小心鮮花有機會脫色到衣服上。如果唔介意用膠花，去花墟或金都商場都有唔少商舖選擇。即使買膠花，其實亦可以訂造一個岩自已的膠花，不過要預一些時間俾舖頭訂造。

化妝

選化妝方面，一般最後都要找信得過的人，記得找化妝先要預留時間俾佢試妝，睇下邊隻妝岩，然後再同提佢記低你想要的效果，唔係的話去到Big Day佢化完妝才發現搞錯左就慘了。另外，不要將所有雞蛋放在一個籃內，負責新郎／新娘同其他姊妹團可以安排唔同的人去做，雖然要俾多ｄ錢，但等佢地可以互相照應(最好是其中一位是自已的友人，不會那麼計較；例如有化妝姐姐帶漏野，另外一位可能都可以借用，）。

另外，如果怕麻煩，又想當日幫你手的人較為有團隊精神，可以考慮係一間地方找哂租衫／化妝及攝影（亦可以連埋租車）一條龍服務。等佢地互相可以coordinate d野，唔駛咁煩。在此提醒，如果用唔同公司服務，記緊要同佢地講清楚ｄ流程同時間安排，亦要有人當日做溝通的角色，否則你等我，我等你就不太好了。

租衫／買衫

由於買左衫之後要擺放，所以除左新娘中式紅色內衣之外，我地兩個同雙方家長都無特別買只可以在結婚用的衫。不過一些平時都用得，例如雙方家長的西裝／晚裝，又或者新郎西裝，就租買都有。但是，對於姊妹衫來講，又有點不同，因為不只是兩個人的事，租衫係會有訂衫及還衫的問題，如果租而非買，又要改，又要拎，姊妹數量越多則涉及的人力就越大，係價格差不太遠的情況下，都係決定俾錢交俾姊妹團訂造算了，反而自已租衫著。

千萬不要貪平係婚展選租衫公司，因為實在太多變數，往往會有人發現租衫的基本套餐包的都是唔靚的衫，又或者狀況比較唔得（例如好多塵）。去到想選一些好一些的，又要加錢升級套餐。因此，租衫呢樣野強烈建議要到間租衫公司實地視察，睇下現場換衫環境（例如有沒有三面鏡可以睇到全身）、啲衫的存放情況、租衫公司借衫／還衫安排才作決定。特別要留意係如果租好多套衫，間租衫公司距離公共交通工具好遠，除了要準備皮喼外，記得要租的士或貨VAN拎衫同還衫了。另外亦要問清楚租衫公司營業時間同拎衫安排（例如最早／最夜幾點借／還衫），亦要問清楚各項可能雜費（例如唔見左個衣架／膠袋駛唔駛俾錢、衫以外的飾物是否免費借用、整到污垢點計等）。

另外，租唔同的衫價錢可能差很遠，例如租婚紗同租奶奶衫就可以差很遠。如果租衫套餐租全部衫一樣價錢就未必太抵，可以格多幾間價再考慮。不過要留意分開不同地方租衫的話，試身及還衫又係一件好煩的事。特別係當你要在結婚前最後幾天忙都一頭煙的時間去搞呢Ｄ野。

好彩自已是冬天結婚，免卻出汗的問題；由於婚期岩岩過左農曆年，買不到鮮花，又不須要考慮用鮮花做手花或花球的脫色問題。租衫公司特別提醒如果夏天出汁多，要特別帶濕紙巾，防止不同的衫脫色互相影響。另外，佢地提醒要掛起租左的衫，如果放在喼太耐會唔靚。西裝就用張卡扣住啲花。