婚禮當日攝影、朝拍晚播及紀念相簿

近年流行的朝拍晚播真係令到我地及兄弟姊姊團辛苦左好多，因為除了玩遊謝要俾人攝入鏡中外，亦要係前後唔少時間補拍好多影片，令到成段片成為一個小故事。其中有唔少要係戶外拍攝，大風又多雲之下真係令大家辛苦了。

如果朝拍晚播要俾時間攝錄師當日進行剪接工作，當日就見到中間休息時間，攝錄師拎左電腦去到酒樓現場進行剪接，然後即刻用電腦播放，避免播唔到碟的問題。

另外，影片的剪輯效果係會講錯另一個故事出來。明明個日我做左20次sit-up，點知個朝拍晚播只係剪左頭幾下同最後一下訓低，攪到我好似好唔掂咁，要特此澄清呢！

結婚的主角往往到了當日是沒有時間及精力去處理活動的各種問題，但他們又身兼了結婚活動的策劃及統籌的工作，

大約3個月之後才有得羅相同video的soft copy。其實隔左咁耐真係無乜心機睇返D相，不過都選左其中一些相來印製紀念相簿，主要係方便D老人家同可以容易D同朋友傳閱。現時有一些哂相公司的網站可以訂製4R至A4大小的相簿，大約會有20-40頁，視乎各公司的設計而定。有些哂相公司會定期有減價的優惠，網站可以選擇相簿的封面圖案設計以及字樣，然後自已編排放入相簿的照片。我地就再配合埋一些堆砌相片的程式，將一張6R相簿放入9張相片。

場地佈置

由於選用的酒樓無包西式佈置，要另外找場地佈置公司。我地都好鍾意個酒樓場地，因為樓底夠高，影相影得好舒適。講返找場地佈置公司，係婚展見到好多真係花多眼亂，最弊係呢d野好講求口碑，又好難睇都真實樣板（雖然無真實樣板睇，但如果間公司開得耐，都可以叫佢地show返之前係相同或相似場地佈置的相，有時可以睇得出佢地可以整到什麼效果同埋點樣同個場地配合，因為不同場地有時可以差很遠。另外，不同的套餐包含的布景／裝飾亦相當不同，因此適宜叫有關公司俾多些樣板相片睇下）

最後，因為搞結婚期間去左朋友的婚宴，見到場地佈置簡單而美觀，所以問左佢介紹佈置公司。結果又真係整得幾好，值得一讚！

印帖與派帖安排

第一次發佈: 2014年9月27日
修訂: 2017年2月25日

[2017年修訂] 呢篇文係這個BLOG最高瀏覽量的文章,所以2017年修訂了部份內容

印帖方面，在不少酒樓或酒店訂酒席都會送一定數量的請帖。如果要出帖的朋友較多，只需補印返餘下需要數目的請帖就夠。只要拎住送的請帖去一些印刷公司就可以安排印返一樣款式的請帖，價錢亦相當之平。

相反，如果訂酒席無請帖送，就要自已去找印刷公司，較為常見的是灣仔及長沙灣一帶的印帖公司(例如長沙灣的昌記印帖(網上列的收費係來帖再印,如果選佢地自已的設計,最平都要去$5左右)。另外婚嫁類的商場亦有專有請帖的公司。請帖的價錢可以差距得很大，有$5以下一張去到$20以上一張，平同貴其實亦各有特色，中間夾唔夾頁，係咪中英文對照都有影響，可以行多幾間睇下自已鍾唔鍾意。

如果想自已設計一些特別的請帖，亦有一些網上的印卡片公司(例如咭片皇)會做這類的生意，不過最低消費數量較多，同埋佢地印到的size同普通的請帖有一定的距離。如果選擇自行設計，要留意印刷的效果和電腦效果未必一樣。我地就考慮到網上印卡片公司印到的請帖信封太細，放不到餅卡，所以最終都係選擇傳統印帖公司。

記緊記緊印帖的時間,要查清楚上下款寫法(因應雙方家長的情況,中文的上下款寫法可以相差很遠),因為印錯就大件事了.不少朋友都試過因為印錯而要重印,詳情可參考網上的討論:

中式喜帖 簡易格式寫法
http://www.weddinghk.hk/article/detail?conCatID=39&contentID=9881

派帖方面，如果分開派的話記緊相討共同朋友的安排。由於到big day前幾個星期會忙於安排婚禮各項瑣事，而請帖一般會過大禮後才派發，因此到其實唔會有太多時間可以做呢樣野。建議可以借一些多人出席的團體活動派帖，其餘的就用郵寄方式派發。

出席人士名單

一開始諗名單的時候，往往很快就由想請幾多人（即係席數）開始，然後將嘉賓安排在不同的桌上。名單由男女雙方編寫，製訂者當然包括雙方父母，出席名單往往有上百人以上。安排座位時，首先要參考獲邀人士名單的背景，再考慮每圍人數上限，又再考慮嘉賓的級數安排來安排前後左右邊度坐，排來排去，剪剪貼貼，好像砌積木咁用最少的席數去放置最多的人，但又要確保唔會得失大家。

然而，到最後的幾個星期，往往會發現有一些重量的人物漏了請，又或者為免順得哥情失嫂意，要補請返一些人，又或者有些人去到最後時間才突然說可以出現。跟著就發現有一些圍數坐唔滿人，又或者太多人坐滿一些圍數。另一種情況係因為某些插隊的人較高級，要其他人重新排過坐位來加以遷就。

為此，記得訂酒席時要同酒樓／酒店開清楚可否有些桌多過12人，以及有些桌多有些桌少於12人可否互相填數。另外，亦要留意攝影／化妝等工作人員坐係邊度，因為佢地除左辛勤工作外，亦要醫肚先可以繼續努力幫手。到當天先找工作人員攝位的確可以坐最少的圍數，但是有些桌即時有空位亦未必岩安排佢地去坐，要小心留意呢！

對於我來講，一直都很擔心出席人士名單會出事，果然去到當日就發現出席名單有些不對。輕則打錯名字，重則有些嘉賓請了但又漏左加他們的名字落名單。辛苦了坐接待處的兄弟姊妹團去臨場執生。

汽水與紅酒

依家婚宴一般最普通係除左汽水同茶水嘉賓飲外，最基本都會包埋紅酒。好似以前的年代婚宴勁飲烈酒不醉無歸已經少左好多。不過，並非間間酒席都會包席上汽水／紅酒任飲。一般好少人會自已買汽水，多數都會叫酒店／酒樓處理埋，但就有不少人自己訂紅酒。除左紅酒外，亦有些人喜歡訂埋一些白酒或香檳宴客。

係我地訂酒前，朋友同我地分享的經驗有幾樣，包括：
１）你訂購越多種類的酒宴客，啲客人就越鍾意試多幾款，即係變相會消耗多一些；

２）好難預測究竟賓客會飲都幾多枝（不同朋友的經驗相差很遠），因此只可以買多不可以買少；

３）因此，訂的轉多款，就越有機會有一些款唔夠飲，有些款又剩好多；及

４）賣酒公司一般訂夠某個數額就會包送貨，可以直接安排送去晚宴場地，但飲剩的酒有點難處理（多的話好難拎走同儲存，轉贈亦唔係容易，因為要安排運送）。

我地自已的經驗係紅酒係一樣花多眼亂的東西，亦都好難慢慢試邊隻好飲。結果行左幾間超市後去左馬莎買，因為有職員介紹d紅酒，價錢又係平至貴都有，又有送貨兼大量購買折扣，而馬莎的酒雖然未必好有水準又未至於太差。行超市的時候，有職員提醒如果去超市訂，可以留意過時過節前夕會有大減價，可以用低價購入紅酒。不過都要撞正結婚前不要太耐之前訂，否則酒樓都未必幫你儲存都咁耐。

不過意想不到係送貨日期同寫下訂購表格的附註所寫的活動日期送貨部搞亂左，結果搞到馬莎以為結婚當日才送，而非之前提早送去酒樓，好彩最後發現左問題已經係過年前忙到傻的時間，幸好佢地都搞得掂，真係值得一讚！

由於我地選的酒樓會每桌子包一枝紅酒，結果自已額外訂的紅酒基本上都無乜點飲，唯有當晚盡量將d餘下的紅酒送哂比d親戚同戥穿石。如果早d知道咁多紅酒剩，應該散席前再派俾更多人就更好。

回禮小禮物

一早已選定左牛奶仔同牛奶妹糖做回禮小禮物，因為太太鍾意呢組糖果，又是一雙一對的禮物。不過包裝才是一個問題，因為發現自已裝禮物的話，要選一些簡單包裝的東西。不然，在有限的時間，很難自已（或者找親友）製作特別的禮物。試想想一個婚宴有十多二十圍，講緊百幾二百份禮物，如果每一份要五分鐘製作，隨時加埋要十幾個鐘以上才整好。當然，如果時間充裕，找外間的公司或親友幫手都未嘗不可。

就我們來說，小食物膠袋、紗袋、小盒子都想過，最後選了小盒子。買小盒子又是有些考慮，因為店舖未必有咁多現貨，由於時間緊迫，最後要混合多種不同的顏色盒子來用，但想不到效果不錯呢！如果想睇現貨才買，係太子同深水埗汝洲街附近其實有好多賣繩(各種包裝繩)、紗袋、小盒子等的舖頭，大家不妨可以去搜索下。

Run-down與司儀講稿

呢D野相信很容易就可以找到朋友分享，再唔係在網上找樣版亦唔係難(生活易網站有很多)。不過，要留意樣版始終是參考之用，最重要係究竟適唔適合用要好睇新郎及新娘的風格。大家都唔想個個婚宴都係一樣的安排吧？因此最好婚禮當日前能找司儀傾下，睇下有無什麼修改的空間。

不過更重要係留意雙方父母會唔會好介意婚宴上的言詞（例如喜歡說笑還是嚴肅，新潮定舊式傳統），佢地想唔想上台講野。我地曾經去過一些婚宴，新郎基本上唔食野，全程不斷係咁講野，周圍找人分享感受講恭賀說話，搞到司儀要叫停佢，唔係就都唔知點上菜；又有人的阿爸上台舒發感受，由點解要生個新郎開始講起，話生佢出來好感動，又分享新郎兒時往時，點樣辛苦的養育佢，令到高薪請來的明星司儀都無乜發揮空間。

戥穿石姊妹團

選擇合適的戥穿石姊妹團員是搞一個順利的婚禮/婚宴不可或缺的元素。我們不是要選取最有辦事能力的人，而是要選最合適的人。他們應該能夠互相協調、互相補位、互相配合及互相幫忙。中間最好有人有幫手搞婚宴的經驗，但其實有些人有點小聰明亦可以靈活變通搞定各件事。

經驗小分享係之前要安排聚會見面，認識一下流程，集思廣益。而且亦可以從大家的反應，知道應該點樣調整每個人負責的任務。

另外，最好有人負責做Second in-charge，幫輕下新郎／新娘。呢個人未必需要係戥穿石姊妹團的成員，可以係新郎／新娘的家人。因為婚宴當日主角係會超忙，如果只是派左不同的任務俾各位戥穿石姊妹，大家散開係不同的崗位度做野，有機會出現各自為政，無人做中間聯絡工作。千萬別以為編排左時間表同崗位所有事情就會順利進行，因為過程中有好多突發野，例如影相進度較預期慢、個別人士遲到點處理、影相流程有無分先後等等。

婚前身體檢查

做檢查之前，其實都諗過做唔做。因為做的話，倘若真係檢查到有問題，係咪會影響到結婚呢？但如果唔做，真係他朝先知道，有會否後悔呢？每個人的取捨可能有點不同，所以要同另一半有共識。小貼士係如果婚前檢查，check到需要補打疫苗，要注意打幾針疫苗需時，最好襯早做啦！

對於唔想花多眼亂煩的朋友，可能會選擇家計會的婚前檢查服務，要注意的係由於名額有限，每個環節都要等很長的時間(由預約到驗血再到睇結果)，而且化驗其實都係外面公司負責，價錢亦唔會同出邊私人公司差很遠，包的東西亦唔算好多。所以，參加外面化驗所亦不是不好，不過記得要選一間信得過的，因為有很多人在網上分享貪平遇到一些不快的經歷。

婚前輔導

原以為輔導一定像上堂一樣，聽完之後會得到很多知識，但自已參加的婚前輔導原來係要與輔導師聊天，初頭看來是好像隨意傾計，看似沒有特定的題目。到最後上哂堂填意見表，才知係有topic list，只是有些東西傾多啲，有些就少啲，有些是蜻蜓點水，好視乎輔導員覺得怎樣才是最好的安排。

第一次約好報名，去到除左交錢報名，還要填兩份180條的mc題（Taylor-Johnson Temperament analysis），睇下自已是否同意某些事情，以及覺得對方會點睇。

之後隔左一排才開始參加四次輔導，每隔兩三星期去一次。我地遇到的輔導員主要藉著要我地分享同回想以往在一起的往事，雙方的付出，以致帶出我地相處的一些方式，再說出相處方式在處理衝突時可能的問題，再交由雙方考慮應否改變同怎樣改變。除左傾計之外，亦有些功課要做。

參加左兩堂才開始有啲明白，其實兩個人之間的相處，旁人即是係輔導員有時都好難說三道四，最重要係兩個人之間究竟點做。之後亦會開始講mc test 結果，再引申出其他的議題，例如雙方的性格，雙方如何看對方，有無乜野要注意等等。

我覺得最大的得著是發掘雙方的一些人性的特點，令到大家更認識對方，使大家明白可能會出現的衝突。始終有些事情結婚後一起生活，會變得容易放大。雖然輔導師其實都提供不到什麼可能出現的問題的解決良策，但令雙方想得更多同知道自已的性格亦是不錯的。

呢間野啲婚前輔導甚少談及將來日常生活怎樣做，可能係因為如果雙方懂得處理衝突，日常的生活其實總有方法解決。

不過要留意係上呢一類輔導，好需要兩個參加者都樂意表達自已(呢樣亦會係性格測驗中顯露出來)。如果唔主動表達自已，有時個輔導員都有點無從入手。有些朋友分享係如果新郎新娘其中一個太多野講，就變左只係輔導左其中一人，以非新郎新娘雙方。

輔導亦同上課堂其實有所不同，聽過一些朋友去左上一些課堂，以上堂形式聽一些技巧，或者參與小組討論同其他情侶交流，視乎大家需要的是什麼，不同的方式都會有不同的效果。

Budgeting & Planning

有好多人搞結婚都會嘗試set 個開支target，不過最終往往都失敗告終。個人經驗係最主要的開支集中在搞酒席、買戒指同租婚紗及影相，其他野其實開支有限。因此應該先同另一半傾好主要使費的目標，然後才慳得一蚊得一蚊，係d細數都慳。不過要留意的是「格價」往往是相當費時，如果為左慳錢而導致嚴重影響正常生活作息，則可能會得不償失，因此應集中在主要開支度慳，以及避免浪費，選用一些有口碑的服務，以免再次訂購產品／服務浪費金錢（例如影第一輯pre-wedding相不夠滿意，結果要去第2間公司再影多一輯；又或者訂餅卡／請帖訂左少，到最尾才趕急加訂，結果費用又貴左）

如果想計清楚開支，不妨考慮用一些網上的免費試算表服務(例如Google Drive/Microsoft OneDrive)，等新郎及新娘雙方都可能分開不同電腦/手機一齊mark低開支。網上試算表最好的地方是容許多於一個人同時login，又唔駛將個excel file send來send去，直接上網用瀏覽器就可以用。除了輸入已用的開支外，建議一開始的時候輸入埋將來可能會用的開支，令到試算表除可以用作估算開支外，亦可以用來監察用錢進度，以及各樣搞結婚的各種工作的進程。 最好係每一個item度set 個目標時間，定期拎出來睇下有無什麼項目跟不到進度。多數一開始的時候人都會慢慢來做，臨近婚宴才將事情加速推進。搞結婚其實係一個好大型的項目管理，除非有wedding planner幫你去搞，否則千萬別看輕內裡涉及的工夫呢！

除左慳錢之外，搞結婚亦可以運用現金流的理念。因為結婚開支龐大，有時真係會用到銀行戶口儲蓄戶口幾乎乾塘。因此，最好能靈活使用信用卡，除左可以儲積分外，亦可以盡用免息還款期將還款時間推遲至婚宴過後，讓收左的人情可以抵銷返開支。當然，不是所有開支都可以用信用卡付款，亦要注意信用卡有credit limit，婚宴前後的時間可能要分開不同信用卡去找數。

除左錢同進度的規劃，亦要提早準備一些清單，因為臨近婚宴真係太多野要搞，好多時都會唔記得Ｄ野，以下呢個網站就提供左唔少實用清單的名稱同簡介：
http://wow.esdlife.com/space.php?uid=31565&do=blog&id=153718

Pre-wedding photos

個人經歷

拍攝婚紗相是其中一樣除了選酒席之外，搞結婚最應該先辦的事，因為聽到不少朋友的經驗，有不少的婚紗攝影公司都會拖著慢慢來製作產品。我們由落訂、選衫、影相、選相、睇版到拎貨前後用左四個幾月接近五個月。當然，如果選freelancer或朋友幫你影，時間就可以快好多，不過我自已就無試過啦。

以我影相果間公司為例子，影相的安排都有點複雜，係婚展訂左package，之後找一個影相日之前的夜晚用兩個鐘去選衫（視乎package包幾多套衫，試衫時間可長可短）。由於影pre-wedding photos很多時都要出外，所以一般D公司只會安排較為殘同一種size的衣服比新娘著（男仔西裝就較多尺碼選擇，一般都會好岩size）。雖然影相當日衣不稱身，但係影出來其實又唔太覺，因為攝影師一般都會識得遷就角度。影相日當日由早上十時開始幫準新娘化妝，中午十二時出車，然後一天內到了三個地點一直拍到晚上八點許近九點，中間不計乘車及化妝時間，只有半小時食麥當勞，真係張張皆辛苦！ 當日準新娘穿了婚紗、晚裝同便服影相，而準新郎的我就穿了兩套西裝同一套便服影相。看回全日的二百多張相，真係相當滿意呢!當日全日有一個化妝小姐跟著，而攝影師及其助手就在出車前才加入，司機哥哥都跟左近八小時。

小貼士

1) 條款要注意

選擇pre-wedding影相package時，除左問清楚個package包d乜之外，最緊要問清楚d流程同時間，因為有些公司有好多隱藏條款，搞到訂左package好難用得到（例如假期要加錢、特快拎相又要加錢、改期又要加錢、試衫有無數量限制、package有無使用期限、付款安排、超時點計、book 車期間隧道費同停車場收費等等）

2) 相片數量/包唔包jpeg原檔

現時一般攝影公司會分為：

A) 包拍攝某個數量的相片，可取回某數量經執修的相片供製作相簿

B) 拍攝當日Jpeg檔案全數奉回，另可執修數量的相片供製作相簿

好似我這類喜歡看多些照片的人，最好就選一些會將相片jpeg檔案全數奉回的攝影公司。有不少朋友都有經驗係影相package包左的相片數量(例如數十張)可能只係夠用來哂相簿，但就唔夠選哂D當日影的靚相。全數有jpeg檔案的好處是如果package包的相簿／相架唔夠，亦可以出去再到哂相公司整相簿或相架。我地本來就包左三十張相可以執相再加哂相簿／相架。其餘全數奉回的jpeg檔案有一些係外面其他公司哂，有一些就留在電腦觀賞。一般來說，婚展訂影相package都可以同d公司bargain下，有機會送多一兩個相架／簽名簿／簽名布／網上相簿，又或者加頁。對於影相有數量限制的公司，婚展亦可以爭取送多d相。個人經驗係影一整天的話，影到百幾二百張靚相絕對唔係多。

執相方面，我地選的公司只肯執走一些相片中影到的垃圾或相中人的暗瘡（令塊面光滑），以及相片的顏色，唔肯改高相中人或者改瘦相中人。個人經驗係電腦縮細睇其實分別不大，不過放大哂就可能執下會好些。

3) 拍攝地點

如果係香港拍戶外相，想活用package所包的時間去多些地方影相，記得編行程時要留意地點之間的距離，最好能選擇在平日以及避免上落班時間經過旺區，否則塞車的滋味都幾令人無奈（我地選擇左迪欣湖、山頂及尖沙咀1881去影相，想不到9月的平日都會有咁多人頂住炎熱的太陽影婚紗相，無論係迪欣湖、山頂及尖沙咀都偶然要等下其他人影完才可以影。特別係夜景的攝影時間會較長，再遇上由山頂落1881時是放工時間，在中環塞了大半個鐘，好彩攝影師免費OT幫我地影好哂d相先收工）。

另外亦有些朋友去香港以外地方影相，平價之選係返大陸的婚紗照主題公園影相，貴點可以去澳門，再貴點去台灣，當然亦可以去其他國家／地區。有些人會話台灣同香港價錢相若，其實都好睇你選什麼公司。去外地旅行順便影相當然亦是個特別的經歷。不過要留意各地的影相風格可以好唔同，貨不對辦未必咁容易處理到，訂package亦要問清楚物流安排(例如點羅返D相簿等等)

4) 天氣/時節因素

選擇拍攝日期時亦要留意天氣同季節因素，因為在夏季於戶外影相令人不斷流汗，又容易有蚊，令被影相同影人者都好辛苦，因此要做足準備（例如防曬、風扇、水樽（內含飲管）、乾濕紙巾、一兩套合適內衣／鞋襪以便更換等等）；在冬季可能天氣太凍，令人唔想留在室外，亦容易吹到病。下雨天又會弄髒衣服鞋子，兼難以拍得好效果。

5) 戶內/戶外選擇

如果要去戶外攝影，記得訂購影相package時要問清楚唔好天的話的後備安排係點樣。當然，如果留在studio影，就能避免這些麻煩，但相對來說又無戶外的景物可以影得咁靚。平時帶眼鏡的朋友可以同攝影師傾下帶唔帶好，有時亦可以不同場景不同造型，不過要留意用閃光燈拍下帶眼鏡照好容易有反光問題，所以晚間或者室內帶眼鏡的話會較難影得好。

6) 問清楚可唔可以有屋企人/朋友陪

由於拍攝涉及選衫或選相的過程，不妨訂package前問清楚可唔可以有其他人陪埋一齊去試或選，以免花多眼亂唔知點好！不過貼士係記得選擇口味相近的朋友，不然好容易變成更難作出選擇。

7) 有折扣或免費送的package要特別留意

有時訂酒席會送一些免費pre-wedding的套餐。由於係免費的關係，所以條款多多，規限唔少。亦要留意訂購次序，例如你訂左pre-wedding的套餐之後才去訂酒席，然後才發現有pre-wedding的套餐送，可能就會哂左。當然，另一個做法係俾錢出去訂的套餐主攻室外，另一個套餐就主攻戶內影相。大家可以視乎自已的時間同喜好來好好安排了。

選擇酒席與訂酒席

一個好的婚宴場地，係會令你煩惱少好多。因為佢地成日搞婚宴，熟知婚宴流程，知道幾時應該提醒你做D乜，應該點樣去敬酒。有一些野更是見微知著，值得讚賞，例如當酒樓知道我地想睇朝拍晚播，酒樓安排左特別兩張櫈俾我地坐在主家席旁邊睇。中間一路影相，又有人跟著我地間中俾d清水飲。

決定酒席時，有些酒樓／酒店集團會針對淡旺季或平日定週末訂下不同的折扣或優惠，如果唔係擇時辰的話，想慳D就可以好好利用D優惠日子了。酒席亦是一個適合早些決定的項目，因為有時訂酒席會送不同結婚服務的優惠劵，例如影結婚相、租衫、訂車、場地佈置等等。大家可以細心計一計清楚不同優惠究竟岩唔岩用，扣除優惠後邊一間抵一些，同埋最重要係邊間酒樓／酒店先至係最適合。

酒席地點的選擇其實要考慮的因素都有很多，不同人對不同的方面都有要求，以下是一些常見因素：

1) 可以開到的酒席數目，因為酒席數目其實局限了酒樓/酒店的選擇；數目太少未必肯讓你包場或包起某個範圍／又或者要俾好高的最低消費，數目太多就不是咁多地方可以容納得到；最好可以有多些彈性，包括向上或向下調整數目，如果睇多些討論區就會見到很多人因為酒席數目改變而要改酒樓，最後要在網上向其他人低價轉售訂金）

2) 酒樓/酒店內外環境，例如每張餐桌同主禮台之間有無什麼柱會否阻礙入場或台下嘉賓觀賞台上情況、場內電視或投影夠唔夠、間野樓底高唔高、用什麼刀叉碗碟、裝修是中式定西式、包唔包場地佈置（又係中式定西式，包幾多野）、交通方唔方便到雙方親友（記得要考慮埋出門同回門的路線安排，有好多朋友都無想清楚，搞到big day當日要多次跨區走）、有無免費泊車服務、進場路線夠唔夠觸目、新娘房岩唔岩用（有些酒樓/酒店的新娘房真係麻麻地，記得要看清楚才決定。究竟新娘房設施夠唔夠呢？廁所好唔好用？地方夠唔夠大，能否容許同一時間廁所加廁所外都有人換衫呢？掛衫掛得多唔多呢？光暗程度？位置會否好近酒席位呢？另外新娘房開放時間能否配合當日流程呢？可否早上先擺野入去，然後晚上再搞婚宴呢？）、影音播放安排（例如係咪要特定格式?有些酒樓其實設施不錯，有完善的音響系統可以用來播片又同時播其他音樂。不過有時啲野真係試唔到咁多，有啲格式睇唔到(例如rmvb,jpeg)，有時播野的比例又唔岩(16:9 vs 4:3)，又或者播相時橫直方向唔岩。最好之前轉定幾種格式去試（例如jpeg files + 將相燒做dvd video來播相））等等

3) 詳細安排，例如送幾多席前小食、飲品／紅酒安排、有無包結婚邀請卡、食物及服務質素付費安排（信用卡、現金、支票定本票，幾時付費）等等

詳細訂酒席技巧可以參考網上不少網頁，例如：
http://wow.esdlife.com/space.php?uid=32608&do=blog&id=150459

http://wow.esdlife.com/space.php?uid=25448&do=blog&id=133615

不過在此提醒有時錢係要俾人賺，人地才會做足功夫，唔係靠惡或鍥而不捨就得，太多要求或許會得不償失，因此適可而止，始終服務類ge野係要靠人地用心去做。依家有些酒樓／酒店唔俾員工直接收利是或貼士，要入落公司數。如果婚宴過後，覺得服務唔錯就應該寫返封信俾間公司鼓勵下用心用力的職員，我地都有咁做！

貼士：

A)原來同搞event一樣，去到big day前幾個月酒樓酒席仍然無人預訂，酒樓或許會收最相宜的最低席數要求或送多一些禮物做招來。因此，如果想快搞結婚，而又唔介意選一些淡季，可以大膽同酒樓／酒店傾下，慳返一筆。當然前題係想選的日子並非選擇一些旺季的時間，而又要其他戥穿石姊妹團幫手available啦！

B)有時訂酒席時無想清楚間野排座位時係唔係岩哂雙方父母心意，最好訂落前初步諗下會否因為酒席環境導致男女家坐得好唔平均（例如男家全部好近主禮台，女家就好遠，或者相反）。酒席編排一般係台上望落台下，男左女右。男女家席數要求是一大學問，雖然粗略的席數好早就大約知，但往往去到最後都會差幾席。一般酒樓／酒店都容許早一兩天才講實數，記得訂酒席時問清楚，不過去到最後幾天沖刺時刻往往都會ｄ野趕到亂哂龍，到時才計數分分鐘會計錯，要小心呢！

餅卡

周圍格價後，發現大量訂購的話，不論是唐餅還是西餅都係婚展買會比市面其他地方(一般市面賣餅卡賣得最平的是教協)平，而且婚展大多會有抽獎機會。但要注意，入到場內，有時會發現唐餅排長龍，或許是因為唐餅款式比西餅多，購買需時，行婚展時要注意時間運用呢！買餅卡由於買得越多越平，所以最好計劃清楚才買，避免因為買得不夠，要分開幾次買。

另外，如果在婚展買餅卡，可以用信用卡俾錢，記得留意下邊張信用卡可以儲到最多積分或回贈，有時都可以幫補唔少開支。

在此要提一提好耐無收到餅卡的朋友，現時已有多個牌子無再出永久通用的餅卡，因此用唔哂的餅卡要睇住有效期盡快用左佢，或者交俾其他親友用。不過可以放心的係最多人用的美心西餅卡有效期有十年，所以都可以慢慢用。

戒指

同電視的情境一樣，求婚戒指是可以隨便去買，愛人唔岩著亦可以改大小，選擇亦是銀碼為先，講出銀碼之後，再選埋鉑金戒指定18K金戒指之後，基本上就是選款式，同鑽石大細，花多眼亂，一般鑽戒都會附有證書一張。其實不同的公司，整的鑽戒風格都有點不同，真係可以睇多幾間先做決定。

不過，結婚對裝戒指原來要訂做，而且要整幾個星期，真係最諗唔到。婚展裡面都會有戒指賣，如果想買某幾間大型集團的戒指，又想慳一些的話，可以係婚展先買，不過有時人數重大，要耐心等下啦！另外，亦有些朋友到「樓上舖」的公司買戒指，呢D我就唔敢試，不過睇價錢就見真係平唔少又照樣有證書，如果識得鑽石4C質素證書(例如GIA證書http://gia4cs.gia.edu/ZH-HK/the-diamond-4-cs.htm)想慳一些都可以考慮下。

婚展 vs 婚禮用品商場

婚展幾乎每個月都有，多數是每一至兩次在灣仔會展搞，然後有一次係九龍灣展貿搞。婚展主要有兩個營辦商去搞（可以睇下佢地兩間營辦商的網頁參考展覽時間表：http://www.wedding.expo.com.hk/及http://www.wedding-show.com.hk/），所以不同的婚展規模同風格都有點不同。雖然婚展有入場費，但多數去的時候登記個人資料就可以羅到同一展商另一次搞婚展的入場劵。基本上婚展裡面想要的服務類型多數都會找到，但係是否真係咁平就要格下價才知。有時婚展會有抽獎活動，買滿某個銀碼產品或服務就可以抽就最好，有時都抽到D幾有用的東西(例如免費哂大相服務)。

如果唔想去婚展，其實都可以去一些主打婚禮用品的商場，最著名的是太子金都商場或尖沙咀的百利商場。呢兩間野附近亦有唔少婚紗店或婚禮用品的的店舖。係呢啲商場都訂購某些服務／貨品其實同婚展未必價錢差太遠，不過要注意係婚展期間有好多舖頭（包括酒樓）D職員去哂搞婚展，商場的舖頭可能關左或者無話事人係度。

去呢d地方最容易出事係行行下見間間都差不多，行到累哂都唔想煩即刻做決定，往往之後睇返都會係太心急，諗返轉頭可能未必太理智。建議係之前上網睇定ESDLIFE或香港討論區等forum，
知道邊d服務比較好才決定用。依家facebook有咁多公司page，不妨上佢地d facebook睇下有什麼婚展優惠才決定入場睇什麼。

另外，亦有一些野係唔適宜直接只在婚展選擇，例如酒席（應該要到酒樓實地視察，然後再去婚展同酒樓傾優惠）、婚紗租借（應該上去婚紗店睇實物，然後再決定是否租用）。當然，如果有時間，亦唔駛急於一次在婚展搞掂哂所有野，咁就唔駛搞到自已咁大壓力。即使未決定到婚禮的一些重要資料，例如日子，其實都可以入去行下，有啲初步印象再決定點樣搞亦得。