孖寶的十九至二十一個月

初稿: 2021年8月14日 10:45PM

修訂： 2021年10月3日 2:00pm

終於可以發多一些佢地去行下街，有時坐下BB車，有時會叫佢地行下

身體動作

大肌肉

阿仔識拖住上樓梯，但仍未識落樓梯。出街識拖住大人行街，過馬路搭升降機都無問題，扶手梯要試多一些。可以唔用BB車又唔駛抱出街坐一陣車去其他地方，不過行商場就只可以一陣，太耐佢都會坐低地下唔肯行。

阿女開始自已識唔駛扶企起來，亦追上阿哥識拖住上樓梯。不過佢仍是跌跌撞撞較多，成日突然行行下坐低左。成日出街就想鬆開大人手自已行。

小肌肉

兩個都繼續用匙放野入口食，多左試在碗內刮飯出來食。兩個都開始學用杯／碗飲水，阿哥唔倒瀉入完的成功率高左唔少，開始唔駛奶咀飲野，阿妹仍要努力。

阿女的濕疹

濕疹偶然會嚴重一些，特別下雨的日子，即使開冷氣都會差一些。

與人互動

聆聽指令

孖寶講野的能力稍為進步，多了唔同的發音，但又唔係持久。兩個都樂於表達自已，例如唔想做的東西會擰頭或大叫，想要就點頭。

睡眠及休息

每日大約兩至三次日間訓覺，視乎當日有幾多野玩。

夜晚係大人房訓返自已BB床，夠黑就容易好快訓，一般都可以訓到天光。日頭如果返BB床拉窗簾夠黑訓亦好易訓著。

飲食

阿仔同阿女兩個開始有大牙，但出牙速度再次放慢。兩個都鍾意食野，不過阿仔有時咀嚼完一些東西唔鍾意會吐返出來（例如蘋果渣或唔鍾意食的東西）

體重增長放慢

三個月大約1 kg，兩個都係11kg

沖涼

依家開始要孖b企係度用花灑他們沖涼

帶著嬰兒車周圍走

平常行商場,見人地用嬰兒車推著BB周圍走好似好輕鬆.其實到自已推著BB車,又別有一番體驗。

將軍澳推BB 車體驗

之前居住係將軍澳，可說是天橋之城，不少私人屋苑都有天橋連接。即使並非有天橋連接的新型屋苑，一般無障礙設施亦做得相當不錯，因此，推著BＢ車周圍走都無乜難度。大部份的商場樓層不多，一般都是橫向發展，因此亦不需要經常轉升降機。

如果坐港鐵去其他車站，推bb車亦很輕易去到區內各站各出口。

市區推bb車體驗

搬出市區後，發現舊區無障礙設施真係有待改善。由於商場樓層較多，因此行商場要經常坐升降機，但部份商場的升降機又要等候多時，又或者位置不理想，令到行商場的體驗甚差。

交通工具方面，坐港鐵的話部份舊區車站人流甚多，但只有一個升降機可到地面，遇上假期時，等候時間甚長，亦相當擠迫（如銅鑼灣站)

孖寶的十六至十八個月

初稿: 2021年6月12日 8:30PM

孖寶之間開始越來越多互動，越來越覺得兩個係孖寶一齊長大同玩樂。

身體動作

大肌肉

間中帶阿仔出街行十數分鐘都無問題。開始識向後行同原地轉圈。

阿女開始愛上爬梳化同自已慢慢行到，不過仍未懂得唔扶硬物企起來。

小肌肉

兩個都繼續用匙放野入口食，偶然懂得在碗內刮飯出來食。兩個都開始學用杯飲水，飲到差不多就成日整杯餘下的倒落身。

阿女的濕疹

春天濕疹又再嚴重返，特別天氣熱或潮濕的時間

與人互動

聆聽指令

孖寶講野的能力似乎無乜進步，不過阿女多左因應其他人的動作而產生笑容。

睡眠及休息

每日大約兩至三次日間訓覺，視乎當日有幾多野玩。

夜晚係大人房訓返自已BB床，夜晚間中都會喊醒，但次數慢慢減少。只要夠黑就容易好快訓。

飲食

咬生果咀嚼能力明顯增強

阿仔去到歲半大約出左七隻牙。另外有四隻準備出場。由於牙較少，阿仔的咀嚼能力稍差過阿女，間中整個口都係食物唔識吞。

阿女有八粒牙，另外兩隻大牙出緊加兩隻準備中，仍然好鍾意見乜咬乜。

體重增長放慢

三個月都唔夠1 kg

特別篇 - 阿女要做磁力共振

 由於照超聲波未能清楚了解泌尿系統的結構問題，因此醫生轉介兒童醫院排隊做磁力共振。醫生話如果跟同聯網醫院的大人一齊排，可能要以年計才排到照。

首先又係要排隊睇泌尿外科同麻醉科，然後再排隊等照磁力共振。總計差不多由尿道炎出院計要半年才排到磁力共振。

做磁力共振之前一個工作天要去醫院入院做新冠肺炎化驗，手續辦好耐，但入到病房抽sample係超快。

到做磁力共振的一天，做之前唔可以進食，連飲牛奶都唔得，只可以飲清水或比較稀的清晰液體，例如蘋果汁。起身後直接換衫帶阿女去到醫院，搞左一輪入院手續後，去到病房，轉係特別室插尿喉，點知搞左一輪個醫生搞唔掂，阿女大哭，要急CALL 其他姑娘同另一個醫生幫手，再搞左一輪，搞到阿女喊到訓著後，先見出返病床。跟著又有兩個醫生過來巡房，見到條喉唔合格，在病床上即刻再搞，今次好快就搞掂。

跟著就到最難搞的打豆，上幾次係醫院打豆由醫生操刀，都搞左勁耐，阿女勁喊，今次由抽血員操刀，有埋電筒，一針搞掂，流露勝利的眼神。

之後坐輪椅抱住阿女落去Ｘ光部等磁力共振，等左個半鐘有多，由11點幾等到12點半，阿女抱到訓著覺，食晏時間搵左另一組人加班去照，勁FULL。照之前要落一些訓覺藥，但藥力只是剛剛好足夠訓著，好容易就醒，又要加耳塞。

照到兩點幾再出發來，去到復甦室，等左兩三個字就醒左，不過都係好迷糊。由於無沖定奶等佢，所以同男護士拎左支黑加倫子紙包飲品俾阿女飲。佢好快就飲左大半，然後又訓返。

跟著返病房，又係訓一陣醒一陣，由於返病房換尿片抽走尿喉後，無小便，因此係咁俾水同奶佢飲，去到日間病房六點關門時，終於有小便，無血絲正常，唔駛轉去留夜病房等，可以出院回家。

~~~~~~~~~~~~~~~~~~~~~~~

隔左個半月終於有得去睇報告，其實結果一如預期，同照超聲波得出的結論相若，醫生建議再做另一個核子掃瞄MAG3 (上次做的是DMSA)

孖寶的十三至十五個月

初稿: 2021年2月14日 10:30PM

這段時間看著孖寶似懂非懂的樣子，一直在想他們何時才轉用說話與人溝通。

身體動作

大肌肉

阿仔的移動能力進一步增強，終於由行幾步路漸漸變成行幾分鐘以至十數分鐘都無問題。有人扶住的情況下，亦開始慢慢走幾級樓梯。 聽到音樂開心的時候亦能聞歌起舞。

阿女的移動能力由開始自發識坐，變成識得企，然後再扶住行，再背靠圍欄。隨著探索能力明顯增強，阿女多左周圍逛同拎唔同的東西玩，不同暫時仍未夠力爬上梳化。

小肌肉

兩個都開始教佢地用匙放野入口食，暫時只可以放入口，未懂在碗內刮飯出來食。

阿女開始識得從柱座拎圈圈同放圈圈。不過孖寶都未太識玩不同形狀不同洞的玩具。

阿女的濕疹

明顯好轉，無須頻密用藥，只是偶然情況轉差才局部用一兩日藥。不過仍需頻繁用潤膚膏。否則天氣一轉就迅速轉差。

與人互動

聆聽指令

阿仔多左好多，會拎野同俾野人，亦有手指指

阿女就鍾意手指指

兩個都偶然bye bye 手勢

不過孖寶講野的能力似乎無乜進步

睡眠及休息

睡眠時間逐漸減少

由以往約三至四小時訓一次，變成偶然達五至六小時

特別是出街或有野玩的時間

夜晚不肯自已係BB房的BB床獨自訓，經過多次測試後，最終將孖寶由自已BB房搬入大人房訓返自已BB床。夜晚間中都會喊醒，但在大人房內很快就訓返。大人睡眠質素有改善。

由於時值冬季，日出時間延遲左，他們睡醒的時間亦有所順延，整體睡眠時間其實長左。

飲食

咬生果咀嚼能力明顯增強

阿仔有四粒牙生左，另外兩粒生緊。由於牙較少，阿仔的咀嚼能力稍差過阿女。不過阿仔開始間中有些東西唔肯食。

阿女有八粒牙，頻密地見乜咬乜，特別是移動能力增強，多次咬其他人的大腿及阿哥的肩膀。阿女一般一開始會品嚐下食物味道才大啖食。

體重增長放慢

三個月都唔夠1 kg

日常生活-智能電錶

去年年尾，有一日中電上黎換電錶。原來成個屋苑的電錶要轉為智能電錶。

轉左之後，上中電網頁或手機app, 可睇到12 小時前每小時及每日的用電量。

一睇就發現，原來天氣最凍個幾日，因為開暖爐，每日用電暴增幾倍，真係好誇張。

美中不足係除了這些咁明顯的電器，其實唔知其他電器邊一些暗地裡耗電最厲害。最多只是知道埋洗衣機洗衫，電飯煲煮飯等較明顯的tasks