樓宇買賣流程

如果傾岩銀碼，地產代理會幫手draft份臨時買賣合約，當中包括有什麼傢私及電器會保留在單位內，以及成交日期等資料。一般built-in／訂做的傢私會保留，其他就要傾，但一般慣例留下的設備(由門窗到電器)即使壞左，都不可以claim返舊業主。如果遇上大廈（即將或正在進行）大維修就要特別小心，因為往往難以寫清楚究竟前定新業主負責相關開支(即使有開支計劃，往往都未必會按預期進行），有需要時就要徵詢法律意見。

成交日期一般最快係簽臨約後1.5-2個月，不過有時上手業主亦要搵樓，因此，可能會加長成交期。如果做二按，亦要預留多些時間俾銀行審批，成交期唔可以太短。

一般約臨約時俾3%業主做訂金,然後兩星期內簽正式合約時經律師樓再俾多7%，至總共10%做大訂

另外,簽正式合約時要俾埋律師樓錢交政府印花稅(如果500萬左右要3%)，以及律師樓費用的訂金（數千元）

所以一簽約之後，至一星期多少少的時間，實際要俾成13%樓價的費用。買樓之前，記緊要預留足夠流動現金，否則樣樣都仍在投資中的話，就趕唔及變賣投資做現金買樓。亦宜提早問清楚銀行繳交樓價的安排。

到簽訂轉讓契時，要俾埋尾數或由銀行俾埋按揭負責的部份，再加其他雜項（包括政府及管理費等）的費用。如果按揭成數較低，亦要注意現金流的問題（不要一次過用盡手上現金，以免無錢應付突發開支）。